dunyatv.az
CANLI YAYIN

Mobil kompüter və smartfonlarda yüksəksürətli "Wi-Fi" tətbiq olunacaq

29-01-2014, 10:52

"IHS" analitik şirkəti mütəxəssislərinin proqnozuna görə, yaxın beş ildə smartfon və mobil kompüterlər yüksəksürətli simsiz rabitəni təmin edən inteqral sxemlərin tətbiq olunacağı başlıca sahələr olacaq. SİA xəbər verir ki, proqnozlara görə, 2013-2018-ci illərdə mobil fərdi kompüter istehsalçıları 2,5 milyard dollar dəyərində 400 milyondan çox mikrosxem alacaqlar. 260 milyon dollar dəyərində daha 80 milyon belə mikrosxem smartfonlar bazarına tədarük ediləcək.

"IHS"-in qiymətləndirməsinə əsasən, 2018-ci ildə dünyada yüksəksürətli "Wi-Fi" texnologiyasını dəstəkləyən 125 milyon mobil fərdi kompüter və 36 milyon smartfon buraxılacaq. Yüksəksürətli simsiz rabitəni dəstəkləyən qurğular dedikdə "WirelessHD", "WHDI", "802.11ad" (WiGig) və ya çoxaxınlı "Wi-Fi" (802.11n 3x3 və ya 802.11ac 2x2 və daha yuxarı) kimi texnologiyaların ən azı birinin istifadə olunduğu qurğular başa düşülür. Qeyd edilən simsiz rabitə standartları məlumatları "802.11n" və "Wi-Fi"-ın əvvəlki versiyaları ilə müqayisədə bir neçə dəfə daha sürətli ötürülməsini təmin edir.

Mütəxəssislər yüksəksürətli "Wi-Fi"ı dəstəkləyən qurğuların həm istehlak, həm də korporativ sektorda geniş yayılacağını gözləyirlər. Onlar vasitəsilə istifadəçilər məlumatları daha sürətli mübadilə edə, eləcə də "HD" formatlı videonu fərdi kompüter və smartfonlardan televizora ötürə biləcəklər, - tədqiqatda qeyd olunur.


Oxunub: 1 081

Mətndə səhv var? Onu siçanla seçin və Ctrl+Enter düyməsini basın.
OXŞAR XƏBƏRLƏR
XƏBƏR LENTİ
BÜTÜN XƏBƏRLƏR
www.DUNYATV.az | info@dunyatv.az
Copyright © 2013-2020 Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir.